Inti

Inti li ssaħħarni,
inti li tiġbidni,
inti li tħassarni.

Inti li twarrabni,
inti li tiċħadni,
inti li tarmini.

Inti li tidħakli,
inti li titbissimli,
inti li tkellimni.

Inti li tinkazzani,
inti li tirrabbjani,
inti li tindannani.

Inti li tbissimni,
inti li tferraħni,
inti li sserraħni.

Inti li tbikkimni,
inti li tbikkini,
inti li tkissirni.

Inti li int kullimkien.
Inti li m'int imkien.
Inti li int dan kollu u iktar.

Id-Demgħa

Hemm fil-kantuniera,
imdendla fir-rokna t'għajnejja,
tinsab demgħa sħuna,
frott il-għejja, frott il-għira.

Iskot, ja demgħa!
Tazzardax, la tippruvax!
Int, xhud il-qalb u l-imħabba,
ara jfettilek tikxef dak kollu li taf!

Għax hekk kif int titfaċċa,
id-dinja quddiemi tiċċajpar!
Issa għidli din,
il-vera ċ-ċar jew iċ-ċpar?

Mur lura,
u itfih dak in-nar imkebbes hemm isfel,
dak li jsaħħan u dejjem ifixkel.

M'hemmx x'nambuh,
ejja għalih u ħudu u itfih!
Eħlisni minnufih!

L-iSkrivanija Mistika

Hemm bilqiegħda, f'nofs siġġu midfun
ġurnata fi tmiemha, terġa tara kif kollox idum.

Mużika għaddejja, ħsejjes deħlin,
storbju ħiereg u l-moħħ jitbattal.

Tara l-imejls ġejjin.
Qrajt l-imejl.
Spiċċaw l-imejls!
Fejnhom l-imejls?
Għaliex mhux ġejjin iktar imejls?

Imejl wara l-ohra jidħlu u joħorġu,
taqrahom kollha u ma taqra l-ebda wahda!
Fil-fond taf li ma trid taqra l-ebda minnhom,
taf biss li hemm waħda li trid taqra.

Hemm dik li dejjem tistenna,
dejjem tiċċekkja għaliha.
Qatt ma turi lilek nnifsek,
imma taf li DIK qed tistenna.

Fejn int ja anglu elettroniku!
Qanqal l-elettroni u wassali l-imejl!
Ma rridx noħrog mill-kenn ta' wara d-desk,
ma rridx infittex fid-dinja t'hemm barra ax nibża!
Irrid naħseb qabel ngħid, qabel nagħmel, qabel nħoss;
għax id-dinja t'hemm barra dan ic-ċans ma ttihulix!